徐克執導嘅《狄仁傑》系列，經過《通天帝國》及《神都龍王》叫好叫座後，來到第三套《狄仁傑之四大天王》，繼續有華麗電腦特技衝擊觀眾視覺，又沿用劉嘉玲、趙又廷及馮紹峰等班底擔正，並加入新面孔馬思純和阮經天助陣，組合起來究竟有甚麼新鮮感帶給觀眾？日前導演徐克同劉嘉玲到尖沙嘴接受《蘋果》訪問，跟大家分享拍攝點滴。

《狄仁傑》系列中一路圍繞著核心角色「武則天」，第三度演出嘅劉嘉玲話喺拍攝過程中，由漸漸了解到越來越崇拜她，而今次電影內對武則天的內心矛盾着墨更多，跟前兩集中呈現出來充滿霸氣及君臨天下嘅氣勢成強烈對此，徐克表示：「今次更多嘅係武則天潑婦嘅一面，向皇帝發晒爛渣，我成日都覺得武則天其實係一個幾可憐嘅人，驚自己權利地位有影響，無時無刻都處於恐懼。」

嘉玲就話武則天向皇帝撒嬌嘅場面雖然少見，但實屬正常：「如果你係一個男人，見到成日都咁霸氣、咁威嚴嘅武則天，佢點同你上床呀？所以一定係有女人溫柔同媚態，仲有唔講道理嘅一面，事實上真係有男人會受呢一套。」

武則天的媚態和風情，在色誘趙又廷飾演的狄仁傑一幕中表露無遺，講到拍攝過程，嘉玲表示有徐克從旁親自示範肢體動作：「其實當日環境好熱，件衫鑲咗好多珠片壓到全身好痛，但要我感覺好輕鬆咁喺張床上面躝，一啲都唔容易做，反而感覺趙又廷好尷尬，成身硬晒咁跪喺度唔郁。」再度跟趙又廷合作，嘉玲覺得對方整體表現又進步了：「佢結咗婚，人成熟咗，演出嚟感覺好穩陣。」

來到第三集，嘉玲話從武則天身上找到一啲共通點，佢話：「除咗大家都係女人外，最重要係大家都唔會向命運低頭，呢個世界上有三種人，第一種係會錯過機會嘅凡人，第二種係識得把握機會嘅人，武則天就係第三種，喺無機會下創造啲機會出嚟嘅，我充其量都只係第二種啱啱好有機會，喺我面前把握到。」

除性格外，今次武則天的服裝和頭飾依然相當搶眼，嘉玲指要歸功導演同服裝指導：「導演對化妝都好高要求，因為武則天每次出場條眉毛都唔同，每次化完導演覺得唔啱就要落咗妝，由頭再嚟過，所以都花好多時間。」嘉玲補充：「其實o依家戲服頭飾嘅物料已經比以前輕盈得多，我哋第一次拍《通天帝國》嘅頭飾先係最重，最重有三、四十磅，戴住完全郁唔到，所以計落色誘趙又廷嗰幕服裝相對係最輕盈最舒服。」

今次《狄仁傑》系列加入馬思純同阮經天兩位新面孔，徐克話原因有點陰差陽錯：「因為原本馬思純呢個角色，係要被武則天殺死。」在旁嘅嘉玲笑言：「又係我呀？」徐克續說：「係呀，又係你呀！其實早喺《通天帝國》時，我好喜歡鄧超同李冰冰呢對角色，可惜喺戲入面死咗，我一直都覺得好可惜，所以今次點都要保住馬思純。」另指阮經天嘅角色喺電影中實在太厲害：「所以如果有下一集，點樣寫佢嘅故事好考編劇功夫。」

延續徐克一貫對視覺美學嘅堅持，今次《四大天王》內同樣用上大量電腦特技效果，徐克話跟後期製作單位合作多年：「大家都好熟悉有咩要求，花最多時間討論嘅反而係阮經天戲中嘅夥伴白毛猩猩，因為想呈現嗰種真實感，但整體成個後期過程比以前仲快咗。」然而，《狄仁傑》系列未來會否延續落去？徐克稱：「要睇緣份，首先要有個好劇本，如果真係要再拍我希望拍武則天開心嘅一面，因為呢幾集都未試過，相信嘉玲都認同。」

採訪：曹家誠
攝影：陳俊強、廖達燊
場地提供：Peninsula Hotel
劉嘉玲服裝：Saint Laurent

精選娛聞，喺晒《娛果》
http://fb.com/appledailyent