今日書展開鑼，女星寫真戰揭開序幕。張沛樂（沙律）孖住趙詠瑤（Kimi）推出《閏蜜遊記台灣篇》，原本係首個書展中嘅寫真簽名會，不過二人比原定活動時間，遲到成45分鐘，搞到一班書迷苦等二人。

當二人到場後被問點解遲到？佢哋話︰「隧道好塞車，加上落大雨，截的士加50蚊，都截唔到車。」二人不停向在場人士講Sorry。由於今日係書展首日，佢哋仲係首個寫真活動，問二人係咪出師不利？佢哋話︰「真係唔好意思，我哋着住高踭鞋嚟跑同截車。」被問平時邊個係「遲到王」，Kimi話︰「我化妝就好快，睇吓沙律要唔要set頭，如果set頭就耐啲。」

問佢哋一齊去外地旅行時，對方有冇啲難頂嘅嘢？Kimi就話︰「沙律好反瞓，有次佢試過打咗我一把，不過我都感受唔到。」不過沙律就話︰「佢哋話有啲咩靈異嘢，我全部都感受唔到。」Kimi接住講︰「去溫泉酒店時，我就見唔到，但都感覺到，好似有啲怪怪地咁，通常之前一晚執定第日影相嘅衫，點知執咗好耐個人都唔集中，同埋好唔開心，第日上車同化妝師一齊喊！（係咪有壓力？）唔關事，只係個日冇啦啦咁樣，同埋離開個度就冇事。」

講到本書都唔係好性感？佢哋話本書係旅遊書，想吸引女仔睇，仲有好多靚位同靚衫睇。至於本書嘅銷情，佢哋話︰「反應比預期中好，有fans叫我哋唔好咁性感，怕畀阿媽或老婆鬧，唔敢帶番屋企，但亦都有人話，有兩公婆一齊睇，覺得本書實用。」

其實沙律同Kimi孖住出呢本書，早排被網民話佢哋吊金龜，人妻Kimi就表態︰「唔好燒埋我，我係幸福少婦！」（新聞連結︰ https://bit.ly/2NYfXoH）網民就話Kimi冇義氣，睇番今日佢哋兩個一齊遲到，Kimi又發功話沙律︰「如果set埋頭就耐啲。」呢句，好姊妹喎！

精選娛聞，喺晒《娛果》
http://fb.com/appledailyent