當年今日
關於我們

701收料站:友利唔似係乾炒

蘋果日報 2004/01/10 00:00


今次真係走寶啦,小初連續兩日講天地數碼(500),睇住隻股係咁升,竟然唔記得睇埋佢阿媽友利控股(419),兩隻股噚日齊齊發威勁升,似乎炒開新股、紅籌國企嘅股民,開始將資金調去細價股炒作。
天地數碼前日勁升後,噚日一度出現震倉,低見1.48元,其後又三扒兩撥抽番上去,埋單再升24.7%,收1.97元,成交金額接近3000萬元。公司話同人哋洽商配股,但走勢咁飄忽,真係唔知佢點樣定價。
至於友利亦唔輸蝕,最高見過0.072元,收0.067元,勁升42.5%,成交股數有成1.48億股,金額898萬元,睇落唔係乾升格局。

市傳亦想配股
經紀陳話,天地數碼股價急升,表面上友利以水漲船高概念跟炒,但市場有傳聞,如果友利到價嘅話,相信亦有機會與阿仔一齊搞配股。
至於點樣先為之到價,經紀陳就話市場傳聞嘅目標價,同天地數碼一樣天咁高,再次搞到小初十五十六,唔知信唔信得過。
慕容小初