恒基發展（097）上星期三，忽然一棍，單日升18%，開始有異動，恒發要長短打。恒發上星期公佈話，正係商討出售手頭三橋合營全部60%權益，兼考慮喺出售之後，收購新資產。
到上年年尾，恒發收費高速公路經營權總值1.8億銀，就算加埋物業、廠房，總額都係區區7.7億銀咁大把。所以，就算集團出售大部份嘅非流動資產，都唔似得出售煤氣（003）權益咁和味，亦未必會有特別股息派。但要咁睇，集團若果真係逐步出售基建項目，就再無重要業務喺手，加埋恒發又份屬四叔系，恒發之後點發展，先最有聯想嘅空間。
又恒發連扣埋所有特別股息之後，最新NAV講緊0.73元，現價（0.52元）仲係有折讓。博恒發有搞作，可以買啲擺埋一邊，又或炒一轉短線博上NAV，潛在回報率都講緊40%。

　

冷吼錦興博升七成

錦興（275）最新NAV0.62元，現價（7.3仙）折讓高達88%，有冇咁離譜？又錦興今年3月尾，可供銷售投資及持作買賣投資，總額約莫19億銀，好保守咁計數，扣埋呢筆投資總值，錦興嘅NAV都講緊0.24元，折讓仲係高企68%。
折讓咁大，又會唔會引起大股東興趣，好似以前咁，進行回購或者增持？有理冇理，冷吼錦興，就當短打博NAV收窄到80%，錦興現價都要升近70%，到0.124元。