大市創新高後,例要調整,噚日午市跌勢最急之時,恒指曾一度下跌逾210點,收市20669,跌151點;期指特別強,現貨月期指收報20684,僅下跌73點,由上日低水64點變番高水15點。
今個禮拜推介幾隻股票,最威水係中化化肥(297),噚日最高上到3.43元,收3.32元,逆市而升5仙,若非個市跌得咁急,中化好大機會已可寫下新高收市一頁。中化升勢已成,短線可繼續持有,到3.70元獲利,中線目標係坐四望五。
位元堂(897)推介時係0.35元,跟住股價就上到0.405元,升幅15.7%,噚日收0.37元,可視為衝破下降軌嘅後抽整固,由於新升浪已確認,上升目標係0.62元。
噚日推介嘅光大國際(257),急升一日後借跌市之勢而進行整固,收1.33元,跌6仙,可趁機收集,環保水務股係今年大熱股種之一,中線睇好,光國升破1.41元阻力可加碼,初步目標係1.60元,中線可見2字頭。
華基光電(155)推介當日走勢令人失望,高開低收,但噚日大跌市中又有強勢表現,平收0.73元,相信升勢發動前的最後震倉已完成,短線仍係以0.90元為上升目標。