經濟唔好，裁員減薪嘅新聞幾乎日日出現，搞到個個打工仔冇晒心機。非牟利團體「社區導者學會」發起「開你的心行動」，勉勵港人打開個心其實可以好快樂。學會噚日舉行啓動儀式，請咗好多名人分享快樂心得。

壞事都會變好事

歌手謝安琪認為快樂係自己選擇嘅，好似佢明明唔鍾意啲人喺戲院唔熄電話，但早排同老公拍拖睇戲，其間有觀眾嘅電話鈴聲響起，佢唔單止冇嬲，仲非常開心，因為響起嘅正係佢首歌，場內唔少人仲拍手歡呼㖭！陳志雲嘅開心秘訣係每日起身同自己講「我好開心、我好靚仔」，講講吓連身邊人都覺得佢好靚仔喎。志雲大師又提醒大家每件事都有正反面，例如死亡令人學懂珍惜。
雖然有唔少人炒燶股，林以諾牧師同曾繁光醫生反而覺得咁樣先可以同首富李嘉誠或者賭王何鴻燊份身家拉近啲，因為佢哋一定蝕得多過普通市民。學會召集人梁劉柔芬嘅開心事好簡單，就係只要可以同老公梁生一齊行街。