聽日母親節，小妹周圍摷料點樣同媽咪安排節目，噚日同銅鑼灣世貿中心公關姐姐Vivian傾開偈。佢話商場首次推出母親節統籌服務，網羅唔同餐飲、禮物、美容、花束等四個套餐選擇，方便啲仔女同媽咪慶祝母親節。其中新派享樂套餐最啱潮媽，項目包括日本定食、貓貓吊墜連筆、剪髮同穴位推拿按摩，每位價錢$2,000；一家四口可以選擇暖意溫馨套餐，價錢$3,000，「套餐價錢比散叫平起碼一成，仲有護膚品、現金券回贈㖭。」查詢電話：25764121。

太古城中心花藝展

行完世貿中心，搭港鐵幾個站去到太古城中心，就有亞洲花藝展睇，雲集咗日本、南韓、台灣同香港嘅花道師展出過100盆雅致清麗嘅花藝。咁多花睇，唔送花媽咪都收貨啦，何況大會仲安排咗攝影師同參觀者影相（下午兩點至6點），仲提供埋免費印相服務。
鍾意熱鬧嘅媽咪，下晝3點可以去九龍灣MegaBox睇「三代同潮花生騷」，婆、媳、孫三代組合扮成白雪公主、森林家族同怪醫等造型走貓步。
前衞嘅媽咪建議去尖沙嘴K11商場行吓，場內有藝術人體彩繪舞蹈等表演。消費滿$1,000可獲贈君悅酒店價值$860嘅一小時按摩服務。

電郵：mailto:[email protected]