起孖絕對唔係麥菲文呢位澳洲名牌的專利，事關其香港行家鄭俊偉跑到今午（24日）第六場四班泥地1200米勝出「超然」後，亦同佢睇齊。

洋名米高的鄭俊偉連同頭場由史卓豐在田草1800米贏「智有心得」，今季已累積四Win，至於「超然」匆出再配雷神莫雷拉順利取勝，單Win及組合獨贏A2分別派47及24元。

雷神玩轉本港賽馬，有時就上半場狂贏，下半場冇影，今午卻倒番轉，個人前五場輸晒零入圍，直至第六場才重響勝鼓，取得個人近兩個賽日第一Win。

講番年輕女馬主李思蓉的五歲馬「超然」，前季起在港出賽一直贏唔到，包括上仗初配雷神於泥地1200米大熱跑第五。今次轉往最外的12檔再攻同程，反而神勇得多，「超然」在雷神一級留放下，沿途居中後位置，末段衝贏外側對手「怪獸都市」贏頸位，馬兒打破在港齋缽。可惜李思蓉卻未有到場。

反觀「怪獸都市」開鑼日（3日）田草1400米大敗後不良於行，隔三星期移師泥地換蔡明紹，今場卻見大幅進步跑第二。而三、四名分別為「靚加加」及「勇冠多」，四重彩派近七萬蚊，三T冇人中正獎，安慰獎派一萬四千幾。