38歲羅志祥（小豬）影視歌三棲各有成就，喺台灣演藝界打滾24年，同愷樂主持《娛樂百分百》，首奪綜藝節目主持人獎，回顧出道咁多年，以諧星模仿同扮女人，令人印象深刻，小豬曾講過因為家境唔好，見羅媽媽辛苦湊大佢，佢唔想錯失任何演出機會，一直努力工作，正當佢事業起飛之際，撞啱合約上糾紛陷入低潮，直至八大《娛百》搵佢做主持，俾佢機會，當時佢好驚訝「那時我這麼不紅，竟然有人敢用我」，小豬2001年起由代班主持，變成節目主持人，一做16年。

小豬係家中獨子，由細就喺康樂隊嘅家庭中長大，父母都發現佢有打鼓天份，佢隨住父母去各地表演，兒時家貧，房東曾喺未事先知會佢哋嘅情況下，搵新房客，更掃佢哋出門，險些露宿街頭，當時小豬講過：「將來我有錢，一定要把房子買回來。」羅爸爸2005年因肝癌病逝，小豬出道多年後，用約260萬港元買基隆老家「大衛營」，重溫同父母嘅回憶。

至於「小豬」個名嘅由來……係因為佢讀小學同初中時，因身型肥胖，皮膚偏黑，被取笑綽號叫「黑豬」，國三暑假，佢扚起心肝，游泳同打籃球減肥，16、17歲時，模仿天王郭富城走紅，同歐漢聲（歐弟）、陳顯政、陳霆叡（原名陳中威）組成偶像團體「四大天王」，後嚟團員相繼退團，小豬同歐弟改組「羅密歐」喺主持界闖蕩，但2000年時，兩人合約出問題，歐弟要去服兵役，「羅密歐」正式解散，小豬手頭上三個節目接連停播，事業受重挫，曾長達1、2年冇工開。

當時小豬曾提到：「以前的我自以為是偶像，長的也比較帥，不應該走諧星這條路，可是當你需要生存時，你可能就必須要走那條路，你要不擠進去的話，後邊可能就掛了。」

小豬早期做綜藝節目，咩都要玩，好似玩麵包蟲子丶被用pie砸臉丶被活章魚吸面等，佢曾被節目要求將手放喺鱷魚嘴邊，台灣節目出晒名重口味，去到《娛百》俾咗佢一個機會，可以唔使一直做諧星，2003年開始推出專輯《Show Time》、《達人Show》、《催眠Show》等，2005年雙料入圍電視金鐘獎，同黑人主持嘅《冷知識轟趴》入圍最佳綜藝節目獎，以偶像劇《鬥魚2》入圍戲劇節目男主角獎，同年11月於台北小巨蛋開騷，2009年、2010年分別以《籃球火》、《海派甜心》入圍金鐘視帝，雖然幾次都鎩羽而歸，成績都算係唔錯。

小豬回首過去，感謝恩師胡瓜（瓜哥）當年教自己主持，並表示：「憲哥（吳宗憲）也教過我主持一開始5分鐘就要讓觀眾笑，也謝謝城哥（曾國城）和董哥（董至成）。」小豬2013年演「空虛公子」一角客串星爺執導《西遊降魔篇》，去年更被星爺欽點演出電影《美人魚》做八爪人魚，目前小豬主力喺大陸市場發展，之但係佢始終冇離開過《娛百》，心懷感激表示，「這個節目是我的恩人，不能因任何工作影響丶或放棄這個節目，謝謝這節目給我舞台，讓很多觀眾喜歡我到現在」。