佛誕前高明寫全民種金騙局（語言偽術後稱：全民退保），諗住應節，話俾大家知種金騙局到老一定「色即是空」，只得長實（001）主席李嘉誠等可以即刻攞賺到盡。

禮拜一講過，呢嚿「全民基金」肥豬肉，冇可能好似十幾年前咁畀外資瓜分，今日中資國企一定會攬番嚟做，淨係收管理費都唔知點計。翻查紀錄，種金打手猶如大行分析員洗腦大合唱推股，背後一定有隻有形之手推動。

基金生意雖然係easymoney，但呢個陰謀只係面嗰層，真正目的，係想香港變歐豬破產，證實港人治港失敗，中央直接管轄，真正回歸。

歷史證明，當你出現管治危機，你就會喪失主權，由「中央接管」。太遠唔講，金融海嘯之後大把case，美國由兩房到各大小銀行，海嘯資不抵債，結果一係國有化，一係被政府嚴格監管。

香港就有中信泰富（267），本來子公司屬「一國兩制」，榮智健任內「促成accumulator事件」，母公司就換人，直接委任。呢個就係香港嘅寫照，只要香港實施全民種金，不問情由咁派，到破產時中央要Bailout打救，就可以取消一國兩制，成為中國其中一個小城市。

點解咁肯定講全民種金一定會令香港破產？以今日中國人不問情由來港搶資源，港鐵（066）要港人等多兩班遷就自由行、奶粉同益力多要向十三億人供應，連中國嘅糞便都要香港人清理，香港派「養老種金」，一定吸引全中國老人做「新香港人」，大攞特攞。

特別係中國正值改革，最頭痛問題係人口老化。既然你咁想派，咁就不如順「打造」香港成為中國解決老人問題嘅off-balancesheetvehicle。

所以，好多打住「民生」旗號嘅疑似梁粉，一方面做種金打手，另一方面又支持新移民任意來港拎著數，香港政府態度欲拒還迎，點解？中方就係等你製造民意，手下仲養住一啲種金打手出聲，例如經東莞政府輸送「研究經費」畀個別本地「教授級」嘅種金打手，目的係將中國嘅負擔移到香港，到破產之日，名正言收番香港。

呢一切都唔會係巧合。正值跌市，Tradingroom靜過自修室，係時候思考股市以外嘅問題。

高明
偶像派財演高明Facebook專頁：www.facebook.com/AppleKoming