趕緊拍《導火新聞線》電影版嘅何佩瑜（Jeana），早前趁開戲前，約埋一班老友去峇里旅行，由於Jeana所住嘅度假屋，距離黑沙灘只需行一分鐘，所以Jeana可以盡情享受黑沙浴，佢話：「我係第一次見黑色沙灘，成個灘都係黑色礦物沙，搞到我成身烏卒卒，好得意！」

由於峇里係潛水勝地，Jeana同班老友「柴娃娃」一齊跳落水，但就因為咁嚇餐死：「今次係我第二次潛水，但都已經有8年冇玩過，基本上唔係好識，今次潛水落到4、5米時，耳仔好痛，當潛到大約10米嘅時候，我好驚、好緊張，跟住不停做番啲減壓嘅嘢，但耳仔都紅晒！我即刻衝番上水面，嗰時我腦裏面就諗到『欺山莫欺水』呢句說話。之後慢慢調節呼吸，再落水就好好多，習慣點呼吸嘅時候，就開始擺吓甫士，又餵麵包畀啲魚食，覺得好似同啲魚仔一齊游水咁，0依家我都想喺香港考番個潛水牌！」