張繼聰同謝安琪(Kay)2005年加入樂壇，張繼聰入行發展平平無奇，2007年同Kay結婚後，事業看似「女尊男卑」，由於人妻Kay係高登女神，搞到張繼聰被受網民高度關注，更故意將張繼聰叫成「謝繼聰」，好在阿聰都好爭氣，後嚟喺演藝事業努力發展，成功喺公仔箱入屋，做司儀同主持人又表現唔錯，喺阿Kay生囡囡張靖時，阿聰一個人孭起成頭家，支持阿Kay「暫別樂壇」，時間證明佢係一個有膊頭有腰骨嘅好老公，時至今日，反而阿Kay被叫「張繼聰老婆」，不過阿聰似乎想阿Kay做佢「影『后』嘅女人」。

佢今日喺IG貼出一張望海嘅背影相，相中見佢身穿紅色小背心，大晒臂肌，佢抵死咁留言：「認真嘅男人可能真係好吸引，吸引咗一位女仕情不自禁咁偷拍我。」唔少網民都估到阿聰口中嘅「女仕」就係佢老婆Kay，之不過Kay回覆：「叫人幫你揸機影相，轉頭又屈人嘅。」令唔少網民爆笑，稱阿聰係自我陶醉，笑阿聰係「影后」，更指佢哋兩公婆又耍花槍，而好友蘇永康就笑阿Kay，寫道：「妳應該都一世(中)計㗎啦，唔係第一次中計，並且打算快樂地中阿聰。」應該可以點「快樂地中阿聰」呢!?

精選娛聞，喺晒《娛果》
http://fb.com/appledailyent