汪明荃(阿姐)、黎燕珊、惠英紅、莊思明、向海嵐等今晚喺會展出席晚宴，汪阿姐指羅家英近日擔任八和會館回歸騷統籌，每日都有唔同老倌、演員演出，而自己係八和主席，所以唔會喺幕前演出。談到佢喺8月開演唱會，阿姐表示已經開始綵排、keep fit同練氣，家英哥有冇一齊做運動﹖佢話：「唏，家英哥唔鍾意呢啲架，佢鍾意打高爾夫球、踢足球。」到時會唔會唱自己歌﹖佢話：「大部份都會唱自己嘅歌，除咗懷舊歌以外。」

對於有網民建議阿姐唱《少女的祈禱》，阿姐笑住話：「一定唔會喇，因為都唔係我自己嘅歌。」會唔會性感演出﹖佢指自己都一把年紀，最重要係衣服適合自己。至於《熱咖啡》魚網黑絲性感look再現﹖佢表示會唱，但唔會重複呢個look。

穿吊帶連身，但入面着咗一件白衫打底嘅黎燕珊，問佢點解咁密實﹖佢話：「雖然我與時並進，但我都會身教。」怕囡囡學得一樣性感﹖珊姐話：「我個女保守過我，但佢身材又好過我。」囡囡會唔會經常po泳衣照去社交平台﹖佢表示：「我成日叫佢謹慎啲、小心啲，阿女都好多泳衣照，但我會教佢哋就算拍拖，喺街上都唔好啜啜，因為係公眾人物，要謹慎小心。」po相上網要唔要畀媽咪過目﹖佢話：「佢啋我都傻，不過係我叫佢啲社交平台唔好加我，我想俾佢私隱，同埋我知佢係po健康照。」佢更大讚囡囡嘅碩士男友有上進。