唐詩詠噚日着deep V到中環出席至潮派對，問到舊愛洪永城表示仍然愛佢，唐詩詠封嘴：「呢個唔評論，我收到佢嘅愛，係朋友嘅愛。」問對方有冇箍煲？佢坦言：「我哋冇聯絡。」係咪對佢死心？唐詩詠話感情係好複雜嘅事，但堅決否認自己有第三者。對於外間覺得洪永城比佢傷心？唐詩詠反問：「點解覺得我唔傷心？感情事想自己處理，唔代表我唔流一滴淚就唔傷心，我哋都有付出過努力過。」

日珈澄清食藥自殺

同場嘅劉萬儀承認母親翁靜晶陷財困：「媽咪打官司冇晒錢，手袋都要變賣籌錢打官司。」問有冇勸好友吳卓林返屋企？萬儀話：「我唔會逼佢。」谷胸嘅岑日珈之前疑食藥自殺，佢澄清：「諗住食安眠藥瞓覺，模模糊糊食咗十幾粒。15歲開始有強迫症，睇咗八年醫生，自己真係冇俾人包。」
Super Girls成員Heidi同Yanny傳爭仔不和，噚日佢哋互攬握手交戲，但Heidi有意無意用背脊對住Yanny。而區文詩對於好姊妹吳雨霏同楊愛瑾反面，佢無奈話：「好怕做中間人，如果多一兩句令當事人唔開心，不如少講兩句。」
撰文：馮仁昭