廖碧兒嘅疑似富家新歡……應該咁講，富就一定係富，至於是否新歡就係「疑似」啦。

如前文所述，呢位已屆40歲富貴才俊從事投資，叫做Calvin Lo，住山頂，頗有家底。離過婚，同前妻有個女，幾年前已經辦好離婚手續。

報道指，Calvin離婚嗰陣，亦有照顧前妻，仲分咗成1,700萬身家俾對方。佢同廖碧兒蜜遊芬蘭之前，有個泰籍電訊公司太子女女友Nina。咁究竟依家Calvin係同Nina一齊定廖碧兒呢？真係要問當事人先清楚。但據稱，佢哋唔止去芬蘭，早前女方去英國探望被尊稱為「猩猩之母」嘅著名動物學家Jane Goodall，Calvin亦有同行。

廖碧兒之後仲貼圖，tag埋Calvin，話期待Jane嘅亞洲之行添。而Calvin兩年前亦曾貼過同Jane嘅合照，似乎兩人都好重視猩猩保育。再睇番資料，原來Calvin同猩猩之母已經識咗超過13年，咁由佢介紹Jane同廖碧兒認識亦一啲都唔奇。