由楊千嬅﹑古天樂（古仔）及梁詠琪（GiGi）等主演嘅《香港仔》，今晚喺尖沙嘴文化中心舉行首映，陶傑﹑關心妍與老公﹑王晶﹑李心潔﹑葛民輝﹑俞琤﹑鄧麗欣﹑衛詩雅﹑黃耀明及余文樂等捧場。

樂仔一臉倦容受訪，講到有傳佢同Ase拍拖，樂仔話：「自己呢個歲數，拍拖會坦白講，若果影張新相就話係女友，我就嚟連朋友都冇晒。」樂仔又話要發展一早發展咗，佢話：「同對方（Ase）識咗好耐，之前喺洛杉磯同對方約食lunch。」

樂仔強調仍未搵到女朋友，而媽咪冇催，佢話：「自己半放棄狀態，妹妹會快過自己，佢拍緊拖。」

而GiGi及古仔一齊受訪，明日係GiGi生日，佢話：「唔知點慶祝，聽日下午仲要做訪問，老公要求我留啲時間畀佢，話有Surprise，我仲未收到禮物。」佢希望身體健康及部戲收得﹗

古仔表示下午已經同GiGi講咗生日快樂，佢又笑言今日約咗個女仔三個鐘，對方都唔肯同佢飲嘢，原來呢個女仔係戲中小妹妹，咁問佢係咪想做老竇？古仔笑言：「我一個人點生，單性繁殖咩？」GiGi搞笑話：「大把人想同佢繁殖﹗」