午市至晚市嘅空檔，餐廳落場，閒置嘅廚房無用武之地，社企「共廚家作」做紅娘，撮合6間願意借出「閒置廚房」嘅餐廳同10幾名基層婦女，等佢哋利用閒置餐廳廚房炮製美食，產品會放喺餐廳售賣或由餐廳直接向家廚入貨，部分基層婦女因而可每月賺取五六千蚊收入。

共廚家作營運總監張晉銘同八方講，做飲食業入場門檻高，基層婦女難以自行開業，故留意可利用餐廳廚房嘅空閒時段，等基層婦女入廚大顯身手。佢哋去年4月獲社創基金資助80萬開始計劃，計劃將由最初同餐廳合作，改由婦女直接喺食物工場下廚，大量製作受市場歡迎嘅食品。佢話產品嘅收入，三成歸食材，四成為家廚嘅薪金、三成為餐廳及社企營運收入。

負責向長沙灣泰餐館提供蘋果梨子茶嘅40多歲基層婦女林蓮英指，果茶係佢家鄉福建嘅名物，以往只會煲畀家人飲，坦言無諗過自己一門手藝可以賺錢維生，而家每周只須花一至兩日煲茶，工作嘅模式適合佢呢類要照顧一家大小嘅基層婦女。

同阿英合作嘅泰餐館負責人林奕峯大讚，果茶同佢哋嘅泰式食物「好夾」，故獲唔少客人垂青，餐館現時每周向佢購入64支果茶，再推介畀食客。