噚日係韓國地方選舉日，唔少韓星都盡自己嘅國民責任到投票站投票，眾星仲會喺投票後上載認證照到Instagram。不過並唔係個個藝人都咁高調，就好似神劇《太陽的後裔》女星宋慧喬咁，上周與演員老公宋仲基遊日後，噚日就低調去投票而被網民認出。據網民嘅留言，係其媽咪喺票站幫忙時，剛好喬妹企喺佢面前，該名網友媽媽返到屋企就大讚喬妹真人好讚。

另外，喬妹老公宋仲基亦被爆料指佢送餐車到韓劇《金裝律師》嘅片場，撐前輩張東健。據報道指，《金裝律師》於前日煞科，宋仲基就送上人參雞湯慰勞劇組及一眾演員。由於張東健及宋仲基之前未合作過，所以外界對於宋仲基送餐車為張東健打氣嘅舉動都相當關注，而早前有報道指兩人有望合作tvN新劇《阿斯達編年史》，宋仲基此舉可視為兩人合作嘅可能性極高。

更多韓流，喺晒《娛果》
http://fb.com/appledailyent