台灣嘅中正機場已經改名、蔣介石銅像被拆，連蔣介石出生、去世紀念日嘅法定假期都話要取消，台灣執政民進黨嘅「去蔣化」行動一浪接一浪，呢個月初，連蔣介石舊時官邸「草山行館」都俾人燒埋，迫到蔣家喺台灣幾乎冇定企。蔣介石個曾孫蔣友常噚日同靚靚香港女友Candice喺元朗黃泥墩植樹，八方先知原來佢已經搬咗嚟香港定居，今年底仲會拉埋天窗，成為「香港女婿」㖭。
早前被台灣年輕女性選為「十大性幻想對象」嘅蔣友常，今年29歲，外形高大俊朗，噚日同女友參加地球之友嘅植樹活動，一人孭一個紅噹噹寫住個「喜」字嘅木盒，上山植樹。呢對小情侶身上嘅號碼布，一個係「520」、一個係「1314」，夾埋諧音就係「我愛您一生一世」，認真煙韌。
蔣友常仲猛讚港人幸福，話啲咁靚嘅郊野公園近在咫尺，喺台北就要花好長時間先去到野外。佢眼見俾山火燒成嘅焦土，話覺得非常可惜。
蔣友常係蔣經國之子蔣孝勇同妻子方智怡生嘅第二個仔。當年蔣經國講過，長孫友柏係開疆拓土嘅性格，將來會事業有成，友常就係輔佐嘅將才咁話。𠵱家兩兄弟果然喺台灣搞咗間「橙果設計公司」，聽講仲搞得唔錯㖭。