德國4強大戰意大利咁精采，有線直擊隊當然唔會放過，一於拉大隊到多蒙特去睇好波。點知一到步，就見到好多德國球迷食意大利薄餅。佢吔諗住食硬對手，最終就消化不良，臨尾仲輸畀對手㖭。
唔好以為德國人係西方人就唔迷信，實情係啲德國球迷都幾信風水，首先佢哋話國家隊喺多蒙特打波未輸過，4強喺呢度對意大利，應該可以手到拿來咁贏喎；另外，球迷為咗贏波，仲約埋成班人賽前一齊去食意大利薄餅㖭！直擊隊喺比賽日中午就去咗其中一間意大利餐廳，竟然見到好多德國球迷喺度進餐，好明顯佢哋真係想「食住」意大利咁話。
個人嚟講，其實都幾唔想東道主入唔到決賽，事關冇咗東道主球迷，單係氣氛就應該差好遠。不過，面對老謀深算嘅意大利，早前見底嘅德國就樣樣都處於下風。德國其實今場表現都唔係差，之不過對手表現更好，尤其是一對AC米蘭中場加度素同派路有上佳演出，呢兩人基本上控制晒今場比賽嘅中場命脈。

德國實力見底

德國教練奇連士文已竭盡所能，將可用嘅球員都用盡，贏唔到係因為實力見底。幾位攻擊球員好似高路斯、普多斯基、紐維利、奧當高全部有上陣，久攻不入最後仲被對手兩次反擊得手，實在無話可說。
意大利再次臨完場贏波，證明球隊真係一世夠運，決賽無論係對法國或者葡萄牙，相信近期有運嘅意大利都可以打高一班波，唔知大家又點睇呢？
有線06世界盃嘉年華，將於8號晚11:30pm——1:30am，播出世盃外景隊採訪滙報