美國好多財經名人願意拎自己嘅時間出嚟做慈善拍賣，最知名當然係股神畢菲特每年一度嘅午餐競投。大家有冇諗過，如果香港都舉行類似活動，普通市民最想同邊位財經名人食晏一粒鐘呢？華華上月做電話問卷調查，畀4位財經名人大家揀，退休五年嘅金管局前總裁任志剛竟然比「超人」李嘉誠更受歡迎。
呢四位財經名人包括超人、任志剛、曾自嘲為「冒牌股神」嘅恒地（012）主席李兆基同埋知名股評人陳永陸。先旨聲明，挑選四位做調查，純粹推斷四人喺社會上有較高知名度，事關訪問對象係牛頭角順嫂等普羅大眾，唔限於股民或者財經業內人士；畀太多選擇又會拖低訪問成功率。

逾六成人最想知香港前景

成功受訪173名市民當中，就有41%選擇任總，排第二係超人，有35%。至於揀選原因，超過六成係想知道香港前景，攞投資貼士只得兩成，乘機自薦搵工同埋八卦對方私人生活分別只得10%同埋6%。
雖然呢個電話訪問相對簡單，但數據多少反映普羅大眾唔係淨係向錢看，確係關心香港前景，特別係𠵱家大家都講緊政改同埋佔中等大議題。任總又畀到人一定信心，起碼覺得佢對香港前景有睇法，而呢個睇法係有一定份量。
可惜呢個只係調查，任總冇話計劃拎食晏時間出來做拍賣㗎。不過，慈善機構不防諗諗佢，話唔定可以籌到一筆可觀善款，並繼淋冰籌款後帶來另一個話題。美國一個籌款網站舊年搵蘋果行政總裁庫克（Tim Cook）幫手，價高者可以同庫克飲咖啡，就籌得476萬元。畢菲特今年嘅午餐慈善競投，以1,690萬元成交就更加唔使講。

李華華
mailto:[email protected]