激光美容甚普遍，惟政府對激光儀器操作監管十分寬鬆，並無規定必須由專業醫護人員操作。有女士到美容中心接受激光去斑，色斑不但加深，臉上更出現一撻撻白印，疑美容師過度使用激光傷及皮膚。

黎小姐（43歲）臉上長有黃褐斑，曾透過醫生接受激光治療，「有兩片斑打唔甩，朋友介紹我去紅磡一間美容中心嘗試做花酸護膚兼激光去斑，成個療程做十次共4,000蚊。」

「家個樣唔見得人」

黎小姐表示，美容師May用花酸為她敷面，再用激光去斑。「去年十月尾做第二次，做咗十分鐘，發現黑斑深色咗，有啲皮膚又變到好似白蝕咁一撻撻，鼻樑本來有少少黑色素，做完就變咗一撻黑斑，好肉酸。家個樣唔見得人，出街要帶口罩。」
黎小姐懷疑美容師使用過量激光令皮膚受損，向皮膚科醫生求診，診斷為激光的併發症，處方藥膏給她嘗試減退黑斑。「成兩個月都未改善，我問過醫生話可以試吓再用激光同果酸整番白，但唔保證效果，要成幾萬蚊。我去消委會投訴，美容中心負責人話美容師租床掛單，唔關中心事，美容師聯絡我就話冇能力賠錢，只肯約醫生同我睇，又叫我畀時間佢再同我做番好，我對佢冇晒信心，點會再畀佢做！」
本報按黎小姐提供的美容中心卡片，聯絡到美容師May，她表示原在內地從事新娘化粧，移居來港後轉做美容，曾向美容老師學習激光洗眉，半年前每月支付1,000元租用美容中心其中一張床及激光機，以freelance自僱形式接客做生意，她強調事件與中心無關。

美容師稱會變正常

Amy又表示，使用的激光機屬內地品牌，黎小姐臉上的為荷爾蒙斑，她第一次利用激光機為客人去這類斑：「嗰部激光機係老師用開嗰部，之前我幫人做老人斑都去到，試吓幫佢（黎小姐）做，講明唔包保一定清到。」她指接受激光後皮膚變黑屬正常，一般等一個多月皮膚會復元，至於變白位置其實已去斑，稍後會回復正常，又認為黎應給予她時間「整番好塊面」。
檔案編號：1208056

律師意見
可雙線追究

律師梁永鏗表示，消費者光顧美容中心，若在服務過程中受傷，美容中心須負責任。他建議上述個案事主同時向美容中心及美容師追究，若其中一方資產有限，可向餘下一方追討。「客人幫襯唔會理中心係僱用美容師定係外判，事主可以告美容師疏忽，同時告美容中心管理不善。」

醫生意見
應立例規管

皮膚科醫生史泰祖指出，醫學界一直認為必須由受訓練的醫護人員操作激光機，進行激光美容前也應由醫生評估及分析病人皮膚是否適合進行，惟政府遲遲不立法規管。「激光呢類具危險性嘅醫療儀器，政府竟然唔使操作嘅人攞牌，好有問題。」
史泰祖又表示，黃褐斑屬深層色斑，「醫生都未必有把握可以去到，做咗可能會翻發，可能會深咗。」此外，激光有副作用，可能令皮膚過白或過黑，有機會康復，但進度因人而異。他建議接受激光美容前應向醫生詳細了解風險及副作用。

社會服務
報料熱線：29290000
社會服務熱線：29908288
蘋果日報慈善基金：29908688
傳真：37112468
網上捐款： http://charity.appledaily.com.hk/donate
各類表格： http://charity.appledaily.com.hk/forms
電郵：mailto:[email protected]
匿名投訴恕不處理。一經投訴，本報保留刊登權利。