現正身處法國旅行嘅周汶錡（Kathy），今日透過公關公司宣布懷孕，佢接受本報電話訪問時表示，之前因為怕傳統（小器），所以未敢公開喜訊，知道有咗BB後超級興奮，佢話：「其實人人都叫我生，因為mix出嚟會好靚，我就講笑咁講，唔靚係咪你哋幫我養。」

Kathy表示一直都想生BB，佢話最緊要BB健康。問到0依家有咗係咪份外小心？佢話：「咁又冇乜嘢喎，都係身邊朋友提點我，因為我好鍾意好高嘅高踭鞋，佢哋成日都緊張我，叫我唔好着，因為自己貪靚，都堅持要着。」

至於想生仔定女？佢話：「我同老公都想生女，因為可以扮靚，仔都冇乜所謂，佢（指老公）係外國人，都冇呢個傳統，女就會Sweet啲，仔會頑皮啲，自己冇乜所謂。」咁不如生龍鳳胎？佢話：「一次過都好啦，不過照到應該係得一個，返香港會照下係男定女。」