第74屆威尼斯影展已舉行閉幕儀式，並於香港時間周日凌晨公佈得獎名單，20部入圍主競賽單元電影將爭逐最高殊榮金獅獎。

日本名導是枝裕和新作《第三次殺人》再拍福山雅治合作，係唯一躋身主競賽嘅日本電影，而華語片則有中國女導演文晏作品《嘉年華》 (Angels Wear White) ，仲有艾未未執導嘅紀錄片《人流》（Human Flow）。

日本著名導演兼演員北野武嘅黑幫新片《全員惡人3》獲選為今屆威尼斯影展嘅閉幕電影，今次繼續由北野武自編、自導、自演，佢缺席每星期六晚主持嘅日本資訊性節目，聯同監製森昌行出席記者會。北野武曾揚威威尼斯影展，1997年憑自導自演作《花火》勇奪金獅獎，2003年再憑《座頭市》獲頒銀獅獎等殊榮。

喺當地剛舉行嘅記者會上，北野武提到下套會將其執筆嘅愛情小說《Analogue》拍成電影，同《全員惡人》系列形成強烈對比。

另外，今次北野武請假到威尼斯，TBS主播安住紳一郎於節目內表示因北野武缺席，錄影廠即少咗40個工作人員侍候。