噚晚播出首集內地張紀中版《西遊記》暫收25點，即約162萬人次收看，有人留言謂一台獨大情況下真係播雪花都收25點，亦有不少人話留名等睇腰斬。至於劇中評語，精簡變成四點:1.好kai；2.好膠；3.好假；4熄電視吧.....。就連石天欣都於微博寫道:「重播張衛健的版本收視應該會更好……」

其實此劇在港播出之前，已有不少經常睇開無綫嘅內地網民留言話可以熄電視，更指該內地版本就連內地人都覺得頂唔順。

至於香港網民笑言TVB今次係「曲線助港」，忍辱負重喺5月1前播出呢套內地版《西遊記》，從而團結香港人支持香港貨香港劇；亦有人話無綫此舉係想討好內地，懶理民意云云。

要留言批評，首要都係忍受咗第一集先，部份評語如下:
「一台獨大，hea住播放任何爛片，你我有選擇嗎？衹可選擇睇同唔睇。」
「技術屎我都算，仲要hea拍。有一半係著淘寶$50唔使嘅卡通衫，想點？好多近鏡都好易看到。」
「睇張衛健做馬嬲，你會發覺得佢好精靈好可愛。相反呢隻馬嬲，成個『儍的嗎』仔咁……」
「其實TVB以前播嘅紀曉嵐包青天之類都好好睇...但係點解要播呢套西遊記...我真係接受唔到佢啲造型同埋自以為好好睇嘅特效，好難頂。」
「可以令無綫浪費左咁多錢買垃圾片，又可以令無綫/強國知道垃圾片冇人睇，又可以令全港節省大量電力，市民又可以有一個鐘時間做自己鍾意做嘅嘢，簡直係winwinwinwinwin。」
「唔會熄電視，因為連開電視既意欲都冇。」
「亞視又冇人睇，不如呢段時間攪下全港熄電視，夠晒環保慳電。」

也有大馬網民嗌唔抵，因為佢哋喺當地睇無綫劇係要俾錢的:「在我們馬來西亞是要付費的，TMD唔睇都要俾錢!」