上季哥迪奧拿執教曼城時，季初打左幾場波，已經同傳媒講奇雲迪布尼係佢合作過嘅球員入面，只係僅次美斯。當時，無咩人當呢句說話係真。時至今季，曼城係英超所向披靡，主場4:1擊敗熱刺之後，哥迪奧拿再次大讚奇雲迪布尼，話佢一個人令到全隊曼城升華。

根據網站《whoscored》嘅數據，上周六晚嘅比賽，奇雲迪布尼除左交出入波外，仲搏到12碼，更有6個成功攔截，表現八面玲瓏。賽後哥迪奧拿話佢對奇雲迪布尼嘅表現無話可說：「我地都知佢用波有幾勁，但今日我地見到佢無波在腳個陣，點樣去跑，點樣去迫，完全係典範。」哥帥之後再補充：「呢段連勝走勢，佢為球隊貢獻左好多，佢令到曼城表現升華。」就即管睇下呢位被哥帥讚不絕口嘅中場，2018年會唔會有個人榮譽落袋。