當年今日
關於我們

海外車訊:
新版萬事得Demio又嚟喇!

蘋果日報 2002/08/09 00:00


一眾車迷期待已久嘅新版萬事得Demio,廠方日前終於披露關於此車嘅資料;新車除擁有全新嘅造型及車廂布局之餘,另外重分有Sport、Cozy及Casual型號供用家選擇。若然新車能於今年年底到港的話,相信屆時車壇,又會掀起一場市場爭奪戰喇。

記者:鄭達基
三個版本形象不同
廠方為顧及不同用家嘅口味,故特別為新版Demio推出三個型號供選擇,包括裝有15吋跑車合金胎軨兼賣相極富活力感嘅Sport、實用為上嘅Casual,同埋配備電動軟摺頂嘅Cozy。三者車首造型都略帶有同廠Mazda6嘅影子,加上一對頗有神氣嘅頭燈,因而令賣相變得更具吸引力;而闊大尾燈配搭,不但能給予尾隨車輛有明確提示,可作80度開啟嘅車門,亦能為乘客於上落車時增添不少方便。
車廂布局變得吸引
至於車廂鋪排方面,新版Demio不但以簡潔易看,同埋空間寬敞為賣點外,布局亦會隨着不同型號而有所不同;其中Sport版車廂會以深藍色為主要色調,襯以銀白面板裝飾,加埋三幅式跑車軚環,一份濃厚嘅跑味油然而生。至於備有電動軟摺頂嘅Cozy就更加吸引,車頂除裝有開關需時甚短嘅電摺軟頂,同埋闊大天窗外,頂級嘅SuperCozy型號更可選擇加裝皮座等豪華裝飾,豪邁之感盡在不言中。
引擎表現強而有勁
然而,廠方為新版Demio配用兩台全新1.3及1.5公升嘅MZR直4引擎,動力輸出強勁之餘,重有慳油嘅特性;而其中一台1.5公升引擎嘅輸出數值,分別係113ps/6000rpm馬力,以及14.3kgm/4000rpm扭力,因而令新車可有更出色嘅性能表現。