順豪資源上月底以兩億八，將中環荊威廣場六層商場，賣畀舖王「波叔」鄧成波，噚日又委託戴德梁行，標售中環順豪商業大廈全幢，今個月三十截標。
聽講，有兩個買家傾得好埋，代理好有信心賣得出，所以標期較短。呢幢八七年起好嘅寫字樓，市值兩億八至三億，樓面五萬四呎，每呎五千幾，以乙級寫字樓計，似乎貴咗啲，不過，因為有近七千呎舖，所以拉高估值。
順豪主帥鄭啟文，近年喺投資市場頻有買賣，早年賣出山頂賓吉道地盤，再買入北角英皇道酒店地皮，今年四月再買入西環明珠豪庭酒店，近月連環沽售兩項中區核心收租物業。話唔定，短期內又再大手入市。

貝沙開盤請食蛇
一手市場暫時未有中高價盤開賣，盈大豪宅薄扶林貝沙灣，趁空檔推出第三期南灣第八座應市。聽講，盈大今晚宴請地產代理，喺售樓處大快朵頤，趁秋風起，食蛇宴，主要目的自然離唔開推介新盤賣點。
呢一座，最細碼單位八百二十五呎，意向呎價至少八千，入場費估計六百六十萬左右。
通常盈大推盤，慣例舉行名人晚會後落實交易，今次應該唔會例外。
市場人士話，貝沙灣二手上個月非常旺，有成七十宗。港置夏笑笑話，一期八座高層A，近千七呎，以逾千四萬連兩個車位成交，每呎逾八千六。