《2017國際泳聯年度頒獎盛典》將於今晚假海南島三亞市舉行，噚晚率先舉行歡迎派對，一班泳壇新舊名將齊齊現身，包括「水霸王」孫楊、「火雞姐」傅園慧、「花樣游泳傳奇姊妹花」蔣文文和蔣婷婷、「奧運冠軍南非飛魚」Chad le Clos、「英國跳水王子」戴利等，而退役老將熊倪、高敏等都有畀面出席，但見熊倪嘅身形就發福唔少。

不過，現場最矚目嘅，當然係昔日嘅跳水金童玉女田亮同郭晶晶難得聚首，晶晶自從嫁入豪門後，一切變得低調，但今次喺運動員嘅聚會，未見丈夫霍啟剛陪同出席。晶晶被安排與田亮編排坐在一枱，與「夢之隊」舊跳水隊友舉杯共歡，田亮仲開心到滿場飛祝酒，大合照更鬼馬地單膝跪在最前，並竪起手指公。而晶晶就成為新泳手嘅集郵對象，向來貪玩嘅傅園慧最識搶鏡，與徐嘉余不時攬頭攬頸合照。而孫楊剛由澳洲特訓完畢，曬到一身黝黑，被網民取笑似包青天，咁啱噚日亦係佢嘅26歲生日，眾人喺歡迎晚宴之後就幫佢舉行咗一個生日會。

更多娛聞，喺晒《娛果》
http://fb.com/appledailyent