教師以前被視為鐵飯碗，今時今日呢碗飯越嚟越唔易食，縱橫教育界半個世紀嘅華叔司徒華，接受電台訪問時重提幾十年前投身教育事業經歷，佢坦言中學畢業後原本諗住去行船做電報生，但由於當時父親病重，佢有責任養家，最終選擇讀師範，貪佢一年就畢業可以即刻搵錢。
雖然華叔為搵兩餐而教書，但做落覺得好有意義，佢憶述曾取笑一名學生把聲刺耳，家訪後先知係因為個學生細個時遇上火災，把聲因受驚大喊而沙咗，佢話至今仍有啲內疚。華叔桃李滿門，佢話最大滿足感係獲得學生尊重，對於教師受壓，華叔勉勵大家，話教師好似揹住個細路行過急流嘅人，縱使旁邊嘅人意見多多，但應該一心一意渡河，將學生送到彼岸，先算盡本份。

舐沾血利刀受傷而死

擅長講故事嘅華叔，亦送咗個《愛斯基摩人捕狼》故事畀特首，佢話個故事講愛斯基摩人將沾上血迹嘅利刀倒插雪地，嗅覺靈敏嘅狼聞到血腥而舐刀尖，條脷因而割傷流血，血一直流，狼一直舐刀尖，最終流血過多而死。華叔話唔同人對故事有唔同理解，初級嘅會認為隻狼為食，食一啖咪冇事囉；深一層嘅會指出狼對血腥上癮，好似吸毒咁；亦有人指隻狼因為嗅覺靈敏而出事，長處反而成為害死佢嘅地方。至於邊個寓意適用於煲呔？華叔笑而不語。
講開華叔，支聯會今日會喺旺角行人專區獻花悼念趙紫陽逝世一周年，之後會搞一個座談會，由下晝四點到六點，歡迎市民參加。
雖然到目前為止，北京方面重未有乜嘢表示，華叔話，佢相信國內好多人都想舉辦悼念活動，因為佢收到有人向佢查問，假如真係有活動，佢哋會辦旅行團嚟港參加。


爆料熱線：29290000、27860099
報料傳真：26239278
報料電郵：[email protected]