模特兒鄭雅菁（A. Jing）是米芝蓮大廚Harlan Goldstein的徒弟，她前年在上環開設摩登泰菜餐廳Clicked。不過，林鄭政府前日頒佈多項新抗疫方案，禁止四人以上的聚集，並硬性規定戲院及健身房等設施，由昨日傍晚6時起關閉14日。餐廳也限制只可以開一半，枱與枱之間需有間隔，或距離至少1.5米，每張枱最多招待四名客人等。A. Jing昨日凌晨接受《蘋果》訪問，大鬧新措施是無聊、不可行：「𠵱家搞到全個城市立立亂，真係對呢個政府好失望，新政策叫我哋減一半，咁可唔可以叫林鄭條命接受減一半呀？」

冇監管如虛設

A. Jing對直斥要求枱與枱之間要有1.5米距離根本難以執行，但相關要求沒有監管機制，形同虛設，建議效法英國代餐廳食肆支付一半租金及一半人工，她說：「之前嘅禁酒令係bullshit，呢啲新政策，根本係減少唔到聚會，冇可能，舉例即係一隊人踢完波，十個人唔可以三、五、二入座，但係可以四、四、二咁入，大家坐埋，你又唔會有人睇住佢哋有冇四個人以上一齊去廁所？呢啲係完全不可行嘅措施，係無聊措施，唔做好過！」

越說越激動的A. Jing更表明不會再支持現屆政府，如果有方法推翻更會第一時間報名參加，她再鬧爆林鄭早期堅拒封關：「一早內地爆嘅時侯，你就好封關啦，你唔好留個乜深圳灣，封啲唔封啲咁。到後來班留學生返嚟，應該更加要出宵禁令、封關啦，所有嘢要做晒，𠵱家係出入境又求其，只做門面工夫，係智障。」

報名推翻政府

A. Jing指做生意，不是只向錢看：「賺唔賺錢喺呢啲疫情之下，真係唔係咁緊要，做得生意有危有機，預咗㗎喇，但𠵱家係關乎人命，最少要保障到我哋香港市民，。我11年前返嚟香港時，好好，大家好有香港人精神，𠵱家見到最多嘅係怨氣、壓力、反政府。」A. Jing批林鄭根本就是官逼民反，連她這些不懂政治的市民也對她極度不滿，A. Jing最後更形容林鄭根本是想迫害所有人及行業。
採訪：林妙萍