華倉一向係分級賽稀客，但文廐呢晚第六場憑「喜多盈」勇奪三級賽一月盃。人逢喜事精神爽，第七場三班千二米文家良再下一城，以大熱門2.6倍巫斯義操刀之「摯友無敵」建功，個人全晚起孖兼捧盃，成為新一年首次谷戰大贏家。
講開文、巫，呢個華洋組合於2015年仲未斷纜，三次賽事每次都合作贏一場，巫斯義更包辦文家良近五win中之四win，夾到冇朋友；巫斯義據說將於周五為1月4日策「精彩鬥士」一案受審，隨時是禍躲不過，呢期贏「摯友無敵」正好收番一些獎金打定底。
「摯友無敵」上仗排10檔，賽後報告話佢難以穩定走勢，今場有幸移入1檔起步，即重振聲威，貼欄守好位重開勝門，成為文廐季內首匹三捷馬。文家良雙喜臨門，但綽號阿叻之馬主陳百祥卻起孖夢碎，頭場佢已經勝出何廐「莫己若」，今場如果贏埋廐侶「如虎添翼」，就可以自製160倍巨型孖寶，無奈文、巫唔放過佢，「如虎添翼」追足大半條直路，都係要輸少少短馬頭位畀「摯友無敵」屈居亞軍，搞到阿叻鬼咁冇癮。今場跑第三係雷神座騎「幸運歡笑」，此駒投苗廐兩戰皆位置，競賽生涯仲未識贏。