【信則有】親認為陸永夫婦做法事 吳佩孚:嚟緊一、兩年有機會再有小朋友
陸永吳佩孚嬰靈超度
陸永太太早前不幸小產,請了法師為「嬰靈」超度,有份做法師嘅堪輿家吳佩孚接受《蘋果》電話訪問表示:「一直有同佢哋算命,兩、三個月前,佢哋搵我睇流年,我話唔止兩個小朋友,應該仲有一個。Reina話係呀,啱啱嗰段時間有,但唔小心小產!Reina話朋友有陰陽眼,睇到佢身邊有個『男仔』,我亦睇到係『男仔』,Reina本身亦感覺到,我建議佢做法事超度。」
吳師傅表示當時有幾個法師一齊參與法事:「我都喺度,其他法師都感應到小朋友係男仔,件事就係咁。」問到「男仔」點解跟住陸永太太?係咪唔捨得媽咪?吳師傅表示:「人係三魂七魄,鬼係一魂半魄,嬰靈出唔到世,冇咗半魄投唔到胎,通常會跟住父母,多數跟阿媽,因為阿媽屬於陰體,感覺強烈啲。佢感覺到出出入入,有時一班小朋友玩時,感覺到多一個,佢唔係十分之驚,但有啲不安,估計到係自己失去咗嘅BB。」
問到超度法師係咪好成功?吳師傅表示:「做咗一場法事,令到小朋友可以順利投胎,下世四肢齊全,做完法師第一次擲杯有聖杯,得到祖師爺應允超度,『佢』都好樂意離開。」吳師傅話做完法事後,對陸永夫婦都有好處:「對於佢自身運或再追小朋友都好啲,嚟緊呢一、兩年,都有機會再有小朋友。」