明年一月七日息影
林雅詩最後一脫嫁人去！
蘋果日報 2003/07/06 08:00
林雅詩：我想快啲生BB！- 林雅詩婚前最後一脫，她說只希望留個回憶，從今以後，她不會再脫了。
- 林雅詩表示拍脫戲不是偷不是搶，其實她脫亦只為生活。
- 林雅詩與男友阿Man拍拖兩年，二人將於明年一月七日結婚。 資料圖片
半年前，與林雅詩（Grace）拍拖兩年，從事建築行業的阿Man（溫文英）在年廿九晚為女友慶祝其二十五歲生日，當時阿Man拖着Grace的手，然後悄悄從口袋掏出一隻鑽戒，把指環套進Grace的無名指上，「食住上」向她說：「生日快樂，不如……我哋結婚咯。」
Grace笑到見牙唔見眼，但沒有回答「我願意」，如此拖拖拉拉了個多月。有日，阿Man問她：「唔知你屋企要幾多錢禮金呢？要擺幾多圍呢？」當時Grace終於決定下嫁比她年長十年的阿Man。
日前Grace在天后接受本報訪問時，提起這幕男友求婚的情景，也不禁笑得花枝亂墜，她表示暫定在明年一月七日舉行婚禮，然後息影，從此告別三級。水銀燈下的日子，也不再眷戀，這次Grace在婚前作最後一脫，她覺得是個回憶，她說不會再脫，因為脫得膩了。
Grace說：「婚期暫定係一月七號，因為嗰日係好日，而且新一年代表有個新開始。本來我有諗過去美國迪士尼註冊，又諗過旅行結婚，但得兩個人好似太寂寞，都係熱熱鬧鬧好，所以留喺香港註冊同擺酒，我諗會擺二十幾圍，之後應該會去歐洲度蜜月。」
阿Man贏得美人歸，在Grace的心目中，到底他有何吸引之處？她笑說：「佢好錫我，又細心，估唔到佢外形好似好新潮咁，但其實佢對屋企人好好，好鍾意家庭生活。有次我哋搵蘇民峰睇相，問佢我哋夾唔夾，蘇民峰話我會烚到佢，所以有時同佢拗兩句，唔理邊個啱邊個錯，佢都一定𠱁番我先，有時我發爛渣，佢轉頭都會即刻𠱁番我嘅。」
阿Man跟Grace拍拖，自然能包容她「脫的歷史」，但要家人也接受她，那卻是另一回事，不過未來奶奶對Grace的支持，實在使她動容。
Grace說：「我男朋友嘅一啲親朋戚友，試過攞住一啲報道我拍脫片嘅報紙，特登攞畀我男朋友嘅媽咪睇，點知佢同啲親戚講：『有乜所謂啫，有人欣賞至搵佢拍，靚咪得囉，不如你拍啦！』佢講呢啲說話，對我係好大支持，佢係一個老人家，我估唔到佢唔單止唔介意，重幫我講說話咁撐我，真係好難得，我好多謝佢。」
以前Grace曾認真談過幾次戀愛，有一個男人，她跟他一起五年了，最後被她的朋友撬牆腳，那一次令她好傷好傷，回想從前的情史，Grace只說：「嗰次係令我好hurt，當我再拍拖時，自己都好驚，我試過對愛情唔認真，亦冇諗過會結婚生仔，但我𠵱家搵到一個好嘅男朋友，我會結婚，重想快啲生BB。」