唐媽媽勇者無懼照食雞 - 李八方

蘋果日報 2004/02/02 00:00


呢排禽流感猖獗,高官名人見面,話題由老董捱得幾耐,轉為互相問候吓重有冇食雞。董婆A1早排力撐話繼續食,財司唐英年媽咪唐尤淑圻噚日亦立場一致,認為冇乜問題,雞照食,真係勇者無懼!
唐媽媽噚日入沙田馬場跑馬,話捧朋友場,買頭場七號「力勝」,點知大熱倒灶,跑得第二,搞到冇得劏雞慶祝㖭。不過唐媽媽重話新年都照食雞,佢重話年初十晚出街食飯先食過,因為同枱人人都食,所以自己都照食可也,不過𠵱家見到啲雞有血、唔熟嘅話,就唔會食。
八方問唐媽媽知唔知懷疑有禽流豬?佢即時好驚青話:「係咩?!唔係淨係口蹄症?我唔清楚,如果出現人傳人就怕囉,所以大家要小心啲,多啲洗手。」不過,唐媽媽嘅人格,始終獨立啲,「洗手」兩字,只係嗡咗一次而已。
(圖)唐英年媽咪唐尤淑圻話𠵱家食雞「唔熟唔食」。
顏英儀攝


傳真︰2623-9278
電郵︰[email protected]