香港人一年四季都愛打邊爐，打邊爐更是一大班人gathering的常見活動。雖然火鍋店開到成巷成市，但要突圍而出，都要花一點心思。今年39歲的Chris，已有超過10年經營食肆的經驗，他於今年頭開設阿肥火鍋，這裏主打麻辣火鍋，更以燉湯作湯底，分滋補、養生、驅風及美顏等，選擇夠多，也可中和熱氣。另外，阿肥火鍋以香港懷舊風格為店鋪主題，不只裝修、碗筷，令客人有回到80、90年代的感覺，加上風乾油鴨脾、炸雲吞及陳皮魚蛋等菜式都充滿港式風情，食出懷舊的味道。

以為踏入春天潮濕和暖，但乍暖還寒的天氣其實同樣需要滋補，位於尖沙咀的阿肥火鍋店提供不少招牌燉湯湯底，老闆Chris說：「好似男士比較偏好嘅杏汁冬蜜菜乾白肺湯，可以清熱潤肺；而天麻川芎白芷魚頭湯，有驅風功用。」Chris表示在正式「烚下烚下」前，先歎啖靚湯，有效緩和打邊爐的熱氣之餘，又可多重享受。

燉湯湯底各有功效
在眾多燉湯湯底中，Chris指花膠鮑魚淮山杞子烏雞湯最好賣，很適合女士，有滋補美顏的功效。「推出前都試驗過好多次，最初唔夠濃，於是落多啲花膠；又試過用冰鮮雞整，但整唔到膠，所以會用新鮮雞，好足料㗎！」以燉湯湯底作賣點，源於Chris與朋友的打邊爐習慣，「我哋打邊爐一定會先飲個湯底，但坊間大多都好普通，通常都好淡。我覺得打邊爐要花多啲心機喺煲湯度，於是就着手研究。」

現時推出的燉湯湯底以滋補功效為主，Chirs說：「滋潤得嚟又要清熱，可以減少打邊爐嘅燥熱。我哋仲有止咳化痰、提神補虛及清潤健脾嘅燉湯，寫埋功效出嚟，會吸引到多啲人嚟試。」除提供燉湯湯底外，Chris的火鍋店以香港懷舊情懷作招徠，裝修上模仿大排檔及各種特色小鋪，如魚檔、菜檔、士多及跌打鋪等的背景及物品。

Chris認為經營食肆之道是保持客人對店鋪的新鮮感，「00年，我喺澳洲讀完會計返香港，喺機場及酒店工作過，因為自己鍾意整嘢食，所以想開餐廳。」03年，他先後開過西餐、日本菜、酒吧及韓國菜餐廳，「前幾年韓風好勁，但最近已經淡落嚟，韓國餐廳少咗6至7成生意。喺香港做食肆真係好講潮流，要令客人keep住有新鮮感，先做得住，所以決定轉做本地特色嘅火鍋店，感覺會穩定及長久啲。」

特色裝修多人打咭
Chris有10年經營食肆的經驗，深明打咭文化宣傳的效用，「現在除咗相機食先影食物外，環境靚啲都可以吸引人影相放上網，曝光多咗就自然多啲客嚟。」他表示佈置懷舊主題比普通一間火鍋店要難，很多物品都比較難找，如舊式水壺、信箱及風扇等。

裝修上吸引，但作為食店當然要睇得又食得，所以Chris特地供應市面上火鍋店少見的懷舊食品，包括風乾油鴨脾、老醋花生、炸雲吞及陳皮魚蛋等。「另外，我哋仲會提供墨汁丸、墨汁腸、紫菜響鈴及西洋菜餃等食物。」他指現時提供超過100款食品，懷舊系列及海鮮都很受客人歡迎，「花甲、蟶子、象拔蚌及本地手切牛都好多人叫。因為有部分股東經營魚檔及食品供應，有熟悉嘅供應商，所以入貨會比市面平，所以我哋嘅售價會平約兩成。」

入牛肉最困難
雖然有一部分食材有供應商，但最主要的牛肉，Chris則表示在開始的品質控制上遇到一定困難，「頭嗰兩個月，不停試供應商，因為以前冇入過手切肥牛，所以要花時間格價。平時客人鍾意食牛頸肉，但初初未同供應商熟落，所以唔會畀靚肉我哋，我哋惟有入多一至兩倍，挑選過先出貨，好彩現時搵到一間唔錯嘅供應商，入到靚嘅手切肥牛。」

阿肥火鍋開業至今，Chris主力在網上透過facebook和ig宣傳，想吸引多些年輕客人，「現時客人年齡多係25至50歲，家庭客都幾多，逢星期五最多人，週末夜晚可以做2至3轉枱，我哋營業到3am都仲有人嚟幫襯。」阿肥火鍋現時每月約賺27萬，Chris同時有經營酒吧The Ring和Red Pocket，他希望日後可以為這兩個品牌，在旺角及銅鑼灣等旺區開設分店。

搵好工，即上 http://www.ecjobs.com.hk