特首梁振英連炒兩個局長，惹嚟左派同公務員圈子不滿，尤其佢對愛國愛港嘅曾德成完全不留情面，更加點起唔少火頭，除咗德成局長嘅哥哥曾鈺成借勢連轟，前政務司司長唐英年噚日加入挺曾行列，用金句力撐任職政府長達8年嘅前同事德成局長，直指「人生中有幾多個8年呢？」戥奉獻咗8年青春卻逼退嘅德成局長唔抵囉。

喻香港似紫砂茶壺

唐唐2012年選特首時，曾以「紫砂茶壺論」撰文，暗寸對手CY唔應該「自以為是」。佢噚日出席一個紫砂茶壺展覽時，又再出招暗寸CY換局長手法唔好，未能做到「好來好去」，特別為曾任局長8年、同自己同樣喺煲呔時代成為曾班子成員過嘅前同事曾德成抱不平。
唐唐話呀，德成局長貢獻咗8年畀市民：「一個人人生中有幾多個8年呢？我覺得更換佢個過程，應該可以處理得更加完善嘅」，係繼曾鈺成、范徐麗泰後，都批評CY換人手法好差嘅「紅」人囉。
而唐唐噚日出席展覽時心情唔錯，透露自己「朝早飲茶，夜晚飲酒」，最愛飲綠茶、白茶，家中都有幾個茶壺，但都只係「粗嘢」，而香港則好似紫砂茶壺，越用越靚。雖然對飲茶有啲研究，但相對飲茶專家、身兼中國茶文化國際交流協會會長嘅全國政協常委楊孫西，佢笑稱自己飲茶只算一種興趣咋。

李八方
mailto:[email protected]