曾主演《人魚小姐》、《妻子的誘惑》等多齣人氣韓劇嘅42歲女星張瑞希，早年轉攻內地市場，直至今年6月先再次接拍新劇《杜鵑之巢》，回歸韓國影視圈。

早前張瑞希來港為雜誌《KWaveHK》拍攝封面照，同時接受本報訪問，自爆自己情迷「發哥」周潤發，渴望同對方合作。

張瑞希自小熱愛港產片，最欣賞嘅香港男星，係一直積極參與慈善活動嘅發哥，希望日後可以一圓同偶像合作嘅心願。

此外，張瑞希亦表示：「其實我都好鍾意鍾楚紅，以前經常睇香港電影，最鍾意睇佢同周潤發合作嘅《縱橫四海》！」

講到香港，張瑞希立即眉飛色舞，除咗想品嚐地道點心外，亦非常期待到訪蘭桂坊。接受訪問時，張瑞希亦偏好坐喺窗邊，佢解釋：「喜歡呢度嘅景色。」

另外，張瑞希早年曾喺訪問中提及人氣綜藝節目《RunningMan》（RM）嘅「國民MC」劉在石係佢嘅理想型。問到有冇計劃過演出《RM》時，其經理人表示《RM》曾邀請張瑞希擔任節目嘉賓，可惜當時因工作檔期而未能演出，未來張瑞希亦計畫多演出中、韓兩地嘅節目。