馮小剛噚日喺北京出席一個宣傳活動，廣告商特別打造一個仿照奧斯卡獎座嘅小金人送畀佢留念，但一向重視票房嘅馮小剛，似乎對呢個小金人唔係咁大興趣。佢同內地記者講起奧斯卡啲戲，話喺香港已經睇過李安執導嘅《斷背山》（BrokebackMountain）同史提芬史匹堡（StevenSpielberg）執導嘅《慕尼黑》（Munich），又讚佢哋係好優秀嘅作品，無論邊一部贏，賽果都合理。不過馮小剛就唔多接受《斷》片嘅細節，佢話：「老實說，作品是好作品，但是我並不容易接受其中男子與男子接吻的畫面，這純屬是個人習慣。」
《斷》片係今屆奧斯卡嘅大熱影片，就連美國《時代》周刊都睇好套戲可以贏最佳電影，不過周刊對李安可唔可以攞到最佳導演獎就好懷疑，因為奧斯卡委員多數係上咗年紀嘅美國電影從業員，可能唔會畀一個咁高榮譽嘅獎畀華人。

《慕尼黑》大冷

另外，奧斯卡頒獎禮將會喺香港時間下周一上午舉行，近日唔少影迷紛紛落注賭《斷》片會贏，加拿大賭博公司Sportsbook現時將《斷》片贏最佳電影嘅賠率訂為一點一一倍，次熱《Crash》就係二點五倍，《慕尼黑》就被列為大冷門，有成二十倍咁高。