大戶繼續等滬港通，市場一片寂靜。上日推介中華汽車（026）破頂飆5.5%，成交創1年新高，收報82.9元。公司有堅實資產支持，加上管理層真金白銀回購，均顯示現價仍然超值，短期隨時變身紅底股。

消息指天津自貿區申請已獲國務院通過，等緊國務院審批，天津股又落鑊。津發（882）、天津港（3382）呢啲一街都知，比較少人提係高銀地產（283），目前在濱海新區起緊一幢名為「高銀金融117」嘅地標高廈，落成後樓高達597米，成為北方最高建築物，集甲級辨公、酒店、旅遊觀光於一身，最新已起到400幾米，落成後勢帶來可觀收入來源。

不過，炒股講走勢，同系高銀金融（530）就更有睇頭，業務亦較多元化，包括金融、名酒貿易及地產。9月中以來股價氣勢磅礡，估計離唔開兩樣嘢：出售資產及分拆。高銀金融持有證券業務牌照，不排除獲內地券商的垂青，並可合作發展旗下保險及理財業務。集團持有法國波爾多及美國共四個酒莊，外界評價甚高，具分拆上市的潛力。此外，九龍灣高銀金融國際中心的興建亦如火如荼，地皮連年升值，加上明年落成後的豐厚租金收入，也可堪憧憬。

http://www.facebook.com/2012jason