人氣韓劇《鬼怪》兩位男主角孔劉同李棟旭因為劇集帶挈,令佢哋事業再闖高峯,更食住個勢展開亞洲巡迴粉絲見面會,當中李棟旭率先宣佈於5月3號喺九展開見面會,門票今日公開發售。
不過好兄弟都冇情講,噚日孔劉趁李棟旭門票開售前夕,宣佈於5月6號喺亞博舉行「2017 Gong Yoo Live in Hong Kong」,門票將於今個月24號公開發售,大搶好兄弟嘅人氣。《鬼怪》兩大男角相隔三日先後開騷,即時令港迷陷入進退兩難,到底兩個都捧場定係只能揀一個?不過粉絲就關心到底佢哋會唔會互相撐場,做對方見面會嘅嘉賓,重演《鬼怪》中嘅HeHe場面。