芬蘭民眾與諾基亞小股東要求Elop放棄呢筆錢,不無道理,事關佢拍板將諾基亞手機業務賣畀微軟,之後佢會走去微軟繼續搵銀。諾基亞都係有苦自己知,先至賣走手機業務,Elop仲要攞走兩億元,小股東同芬蘭民眾當然唔滿意,就連芬蘭總理都出聲話好離譜。
諾基亞主席斯拉斯瑪為平息民憤,親自出馬同Elop密斟,勸佢回水,點知佢連主席都冇面畀,話同老婆搞緊離婚,隨時要分一半身家畀對方。即使佢肯回水,他日都可能要向對方補足差額,所以拒絕就範。
事情反映唔只本港部份官員、政要鍾意出事時,將問題推落老婆身上,聲稱自己乜都唔係好知,乜都係老婆話事,個別外國商界人士都用呢招,仲要遲唔遲,早唔早,攞到分手費就同老婆搞離婚,實行工作與私人感情都要重新出發咁話喎。事到如今,諾基亞主席斯拉斯瑪都要硬着頭皮撲火,指Elop獲發1,880萬歐元(約1.9億港元)補償金,符合控制權變動條件。講到尾,錢都收咗,點會咁易回水?