王灝兒（JW）今日晏晝現身旺角街頭出席品牌活動，仲唱歌同玩遊戲。JW話自己入行咁耐都係第一次喺旺角公開唱歌，見到咁多人感覺好新鮮同緊張，佢話平時自己都有落過旺角行街，問到係咪去男友舖頭？佢話：「唔係旺角都有好多潮牌，不過我每次呢都會戴帽耷低頭行，因為冇化妝。」

講到今晚平安夜有咩節目？佢話：「今晚會同男朋友同埋佢屋企人食飯，今年因為要做演唱會所以都冇得玩，老闆叫我淨係諗住工作唔好掛住玩，為咗演出又唔食得嘢又唔飲得酒，睇住人哋玩咁不如自己都唔好出去。」

JW又透露以往屋企嘅聖誕佈置係媽咪負責，但今年媽咪出咗埠所以屋企乜都冇：「今年完全冇聖誕氣氛，自己都唔係好覺過聖誕，加上屋企冇佈置，每年聖誕我最鍾意嘅活動就係聖誕shopping，今年冇時間出去。」咁有冇買聖誕禮物俾男朋友？JW話：「冇呀，都冇時間shopping，希望佢都唔好送俾我，如果唔係都唔知點。」

更多娛聞，喺晒《娛果》
http://fb.com/appledailyent