【娥事生非】行會葡萄戰 又關企鵝男事?

蘋果日報 2017/06/05 00:20

娥事生非葡萄林鄭

候任特首林鄭月娥即將公佈新班子,三司原裝過度,新任局長幾乎清一色政務官,換血大計明顯落空。3司13局掌舵人無驚喜,行政會議又有無?除咗有前金管局總裁任志剛坐陣有少少驚喜,唔算耳目一新,而且政黨代表不減反增,據聞仲引發一場葡萄大戰。
現屆行會成員中,愛國愛港政黨包括民建聯、工聯會、經民黨以及因為特首戰而辭任行會、葉劉淑儀所屬嘅新民黨,各有一個代表在內,一人一席原本相安無事,但大家又千祈唔好忘記,現屆鄉議局代表張學明雖然以新界人身份入行會,但其實佢都係民建聯成員,據聞張學明下屆離任,順理成章議席由開始坐穩鄉議局主席嘅劉皇發公子劉業強接任。
酸葡萄風波可能出喺呢度噃!劉業強本身都戴兩頂帽,佢同時係經民聯副主席(雖然可能冇乜人為意),若然佢任行會,加上預料冧莊嘅林健鋒,即係經民聯行會內有兩席,雖然行會係諮詢而非實權組織,多個花瓶又點?始終面子尤關,被搶大佬地位嘅民建聯點會順氣?難怪政圈傳出新行會擺位有濃濃的酸味。
最後會點擺平?相信都係一黨兩席,皆大歡喜,現時已非立法會議員嘅民建聯葉國謙料再坐一會,因為身兼港區人大代表,專責就中港問題畀意見,民建聯副主席張國鈞料同時獲任,主力箍票兼就年輕人政策畀意見。民建聯最終冇搵佢頂周浩鼎入專責委員會查UGL,無非想呢位新貴保持清白之身,據聞林鄭對作風踏實嘅張國鈞表現稱許,相信未來發展空間無限。