韓國盛事《SBS演藝大賞》噚晚於首爾舉行，由金鐘國、韓高恩及朴修弘擔任司儀，所以金鐘國就冇孖住《Running Man》(RM)嘅成員一齊行紅地毯，而有份出席盛會嘅宋智孝、全昭旻、全慧彬等女星都唔怕凍，以性感服飾示人，有別於全昭旻、全慧彬低胸晒事業線，智孝就穿上黑色透視裝隱約晒腿及黑Bra。

人氣節目《RM》今年獲頒多個獎項，金鐘國及緋聞女友洪真英獲頒「最佳情侶獎」，兩人喺台上更不避嫌地攬攬。而獲得「最佳人氣獎」嘅李光洙就表示：「真心感謝《RM》嘅成員及工作人員，一直想帶畀觀眾歡樂，但現時仍然有好多不足，我會繼續努力做得更好。」

至於去年先加入節目嘅全昭旻就獲得「綜藝部門最優秀獎」，全昭旻哽咽表示：「完全冇諗過會得獎，咁有份量嘅獎我真係可以拎？感謝喺屋企睇住我嘅父母，去年我喺呢度講過我好幸福，因為通過呢個節目，令我認識到好多優秀嘅哥哥、姊姊，今年一樣好幸福，多謝《RM》嘅成員，以及一齊辛苦嘅工作人員。」

最高殊榮大獎由去年退伍兼主持節目《家師父一體》嘅李昇基撼贏「國民MC」劉在錫奪得，對於獲得咁好成績，李昇基都勁開心兼眼濕濕，又話：「一諗到要擔起呢個獎座嘅重量，心情好複雜。呢個係我小時候夢想嘅獎，0依家得到，好似發緊夢咁。」李昇基話呢個獎屬於全體工作人員及演員，第一次要主持綜藝時，佢亦曾覺得害怕，亦好想逃跑，幸而每次遇到挫折，都有代表為佢打氣，令佢可以順利完成。而《家師父一體》嘅李昇基、李尚允、陸星材及楊世炯四位主持人噚晚都有收獲，李昇基就透過Instagram上載4人開心合照慶祝。

另外，受邀頒發男子新人獎嘅17歲花樣滑冰選手車俊煥喺現場自爆理想型係《RM》嘅37歲女星宋智孝，直認從小到大都好鍾意智孝姐姐，而智孝聽到後即時怕醜遮臉，又笑言等男方大啲先見面，而金鐘國就提議車俊煥上一次《RM》就知道智孝本人係點，不過車俊煥就話就係鍾意智孝喺節目上所表現嘅魅力。

《SBS演藝大賞》部份得獎名單：
大獎：《家師父一體》李昇基
年度最佳節目獎：《我家的熊孩子》
製作人獎：《Running Man》、《我家的熊孩子》金鐘國
綜藝部門最優秀獎：《Running Man》全昭旻
show及談話部門最優秀獎：《家師父一體》楊世炯
綜藝部門優秀獎：《家師父一體》陸星材
最佳團隊協助獎：《Running Man》
最佳情侶獎：《Running Man》金鐘國、洪真英
最佳人氣獎：《Running Man》李光洙
男子新人獎：《家師父一體》李尚允

精選韓流，喺晒《娛果》
http://fb.com/appledailyent