當年今日
關於我們

窩輪搏擊:中移破關3496博得過

蘋果日報 2007/01/04 00:00


對港股較有影響力嘅美股、日股同國內A股呢兩日全部放假,港股唱獨腳戲,但一啲都唔失禮,前日恒指升300幾,昨日再升103點,成交仲增加到640億元,呢啲就係昨日所講嘅投資者情緒變化嘞。
昨晚美股復市,前日歐洲紅盤顯著高收,美股唔應該差過人啩,美股昨晚可以睇好,加埋今朝國內A股好可能癲上去,今日港股再升兩三百點應該唔係難事,大家可以用另一個角度諗吓,就知道睇好今日港股唔係盲目樂觀,昨日個市好似滑浪咁,600幾億元成交,尾市勁掃國企股,好多貨應該已震咗入強者嘅手裏面,用咁多錢玩震倉,今日唔炒上去都對唔住自己。
國內銀行股擺明要炒上,幾隻大嘢都喺低位抽番上嚟,工行(1398)最低5.02元,報收5.15元,建行(939)最低5.03元,報收5.28元,中行(3988)最低4.33元,報收4.51元,班大戶要搞邊科,已經好清楚,中行C輪9457昨收55仙,升12.2%,只係熱身,繼續揸。
中移動C輪3496:中移動(941)昨收70.60元,終破咗70元關,10日線兩三日就升穿20日同50日線,出現兩個「黃金交叉」,成交大幅增加,但係最勁嘅升勢仲未出現,睇個勢應該係先喺70元關收兩日貨,等國內嘅股市開番先大幅炒上,呢個升浪差唔多隻隻大股都上番以前嘅高位,中移動要上番80元係好多大小投資者嘅期望,破咗80元嘅升浪梗係唔得了,不過,穩陣啲,先睇80元。中移動C輪3490昨收1.15元,槓桿率6.1倍(有效5.5倍),對沖值0.88,正股升上76元,3496應該喺1.60元樓上,正股升上80元,隻輪應該唔會低過2元,呢個價買,正股跌穿68元止蝕。
俊樺