樂壇新組合Cassette噚晚喺銅鑼灣舉行新碟發佈會，得到吳浩康(Deep)、Kolor、RubberBand成員阿偉、許懷欣、泰迪羅賓等，現身撐場。Cassette話：「做碟搵咗好多朋友碌人情卡，俾好多意見我哋，o依家籌備緊第二張唱片。好少歌手會出實體碟，多謝公司支持，好多歌手都係做數碼音樂，我哋想有張實體碟，想好似樂隊名咁做一個卡式帶出嚟，不過機係問題。。」

Cassette成員Johnny曾經同過Deep組過隊band叫Closer，Deep話同Johnny好似兄弟般嘅友情，好欣賞佢哋嘅音樂，而自己做歌只會係網上平台發佈，暫時唔會出碟。佢仲話最近構思緊做郊外騷，有諗過去大帽山，唔使買飛，自己度高。

講到吳雨日前話以前搵陳偉霆拍戲唔會推，但o依家就要等等。(相關新聞﹕ http://bit.ly/2FfOy0N )睇番Deep嘅ig，同陳偉霆嘅合照都係3年幾前嘅事，不過Deep話大家仍然係好朋友，佢話：「佢哋兩個嘅事，我唔清楚，吳雨都同陳偉霆好熟，我唔敢講太多。喺我眼中佢冇變，早幾年我搞慈善活動，搵陳偉霆拍片都冇話唔覆或者閃走咗，有幫到手。」

至於同女友傳分手，Deep就話唔想多講：「之前講過唔記得女友生日，其實好多事情冇公開交待，我知大家好關心我嘅感情，我哋兩個人希望有多啲空間。」係咪分咗手?佢話：「我哋關係要磨合吓，唔想因為工作影響感情同帶有壓力，所以唔想向外公開講。」

更多娛聞，喺晒《娛果》
http://fb.com/appledailyent