【各大騎師垂涎】一匹在港初出對手 令到郭能巧驚驚!
郭能協勝神駒上市動力
今日(11日)沙田第八場三班1200米草地賽,騎師郭能為徐雨石馬房之「上市動力」操刀,他直言會份外留意同場高伯新馬房的在港初出馬「協勝神駒」。
「上市動力」在港上陣兩場都輸唔遠,上場跑1400米入直路更似模似樣,一度喺200米加速撲上,但始終進度未夠,最後幾步轉弱只得第6名,今日有1400米唔跑,反而縮程轉戰1200米,原來係郭能向徐雨石建議,認為匹馬具速度應付。
不過,一講到心腹大患,郭能就即時提到「協勝神駒」,佢話呢匹3歲馬喺澳洲兩戰均大勝,運抵香港後三度試閘都有前有後,上月尾大閘一入直路更自動湧出贏出,如果「協勝神駒」今日跑出試閘時水準,真係唔易招架。
今場大摩冇馬出,所以高伯新借到摩廄主帥貝湯美為「協勝神駒」操刀,隨時只係「一次性合作」,所以好多騎師都留意「協勝神駒」,希望帥權日後可爭到手。