立法會位於添馬艦新大樓明年落成，新屋就快入伙，議員噚日率先參觀「示範單位」，睇睇新大樓部份設施模型，承建商特別搭建咗多個模型供議員驗貨，議員睇唔順眼，可即時要求更改，改到啱為止。
議員喺立法會入面，用得最多嘅除咗自己個座位，相信仲有洗手間，因此議員花咗唔少時間研究新大樓廁所啱唔啱坐。白鴿黨李華明話大致上冇問題，美中不足係個坐廁安裝位置稍嫌矮咗少少，煲呔、高達身形啱用，好似佢或者劉秀成身形比較高大者，就坐落伸唔直嘞，希望有關方面可以改善改善。

嫌洗手盆太花巧

女廁方面，何秀蘭讚不絕口，唯一彈嘅係洗手盆太花巧，如果可以用一體式嘅設計就好，既方便清潔，又減少藏污納垢，「清潔工人唔使花咁多工夫去抹。」承建商提供一深一淺兩款設計等議員揀，唔使公投，議員傾向用深木色加雲石設計，襟睇啲咁話。
議事堂座位都係議員關注焦點，幾個議員試咗張新凳都讚坐得舒服，不過對枱面安裝嘅設施頗多意見，包括咪高峯唔方便使用、鍵盤阻碇等，李華明又指枱上個電子顯示屏幕左右上下可移動角度太窄，使用時唔係幾就手，要改改，控制板上字體又似乎細咗少少，老花議員隨時㩒錯掣，一定要改。
新立法會大樓嘅記者室面積增加，不過議員參觀後，一致認為提供畀記者用嘅枱窄窄哋，加闊啲令記者有較舒適工作空間，比較人道。日後立法會新大樓公眾席同會議廳之間有大玻璃，應該唔會再發生旁聽人士掟嘢入議事堂事件，在公眾席示威抗議亦影響唔到開會，對於呢部份，議員冇乜意見。
目前立法會大樓地方細，議員辦公室分設不同地方，日後可同一範圍下工作，噚日亦有議員辦公室裝修樣辦供參觀，基本上同現時或一般政府部門辦公室冇分別，不過民建聯黃定光有特別要求，指現時辦公室間隔牆太薄，要求新大樓要加厚幅牆，以免洩密。
mailto:[email protected]