楊千嬅同緋聞男友丁子高感情撲朔迷離，早排有報道話丁子高翻追舊愛譚凱琪（Zoie），楊千嬅即時話信晒丁子高，只係怪傳媒嚇親老父。噚日丁子高所屬嘅公關公司喺尖沙嘴搞「小．惑星」攝影展，丁子高例牌否認翻追Zoie，佢話：「係作古仔，冇可能，我𠵱家工作上難免接觸到唔同嘅人，我都開始適應呢啲嘢，𠵱家個人EQ高咗，韌力都大咗。」
問丁子高究竟有冇同前女友Zoie聯絡？佢話：「我只係撞到佢，平時好少聯絡喇。」之後就猛對楊千嬅話唔好意思，非常在乎佢感受，丁子高話：「我有同千嬅講番，冇理由要佢父母suffer呢啲嘢，我打咗電話叫千嬅同佢屋企人講唔好意思。」

施念慈有新歡

噚日官恩娜（Ella）、施念慈、JaniceMan（文詠珊）等都有出席活動，Ella之前走光，噚日就非常密實，着埋長袖衫，佢繼續死撐話上次冇走光，佢話：「嗰次係誤會，我真係有着內衣，可能係閃燈同陰影，所以先有呢個疑雲，我都好唔開心，咁尷尬。」施念慈就對前夫陳鴻業下月判刑唔多關心，佢話：「唔需要我擔心，我哋分開咗，我唔想再干涉呢件事。」佢仲自爆有男友約會中。